Бүгін - Ядролық сынақтарға қарсы халықаралық іс-қимыл күні

Бүгін әлем қауымдастығы Қазақстанның бастамасымен Біріккен Ұлттар Ұйымының Бас Ассамблеясы бекіткен Ядролық сынақтарға қарсы халықаралық іс-қимыл күнін атап өтіп жатыр. Осыған орай, Мемлекет басшысы Қасым-Жомарт Тоқаев үндеу жариялады. Қазақстан осыдан 35 жыл бұрын дүние жүзінде қуаты жағынан төртінші орындағы ядролық арсеналдан өз еркімен бас тартып, Семей ядролық полигоны жабылды. Президент осы тарихи шешімнің мән-маңызына тоқталып, халықаралық антиядролық қозғалыс көшбасшыларының бірі ретінде еліміздің ұстанымы өзгермейтінін жазды.

Қасым-Жомарт Тоқаев, Қазақстан Республикасының Президенті:

Біз атом энергиясын жасампаз мақсатта ғана пайдаланған жөн деп санаймыз. Халқымыз жалпыұлттық референдумда ядролық энергетиканы дамытудың стратегиялық бағыт-бағдарын бірауыздан қолдап, Қазақстанның ондаған жылдарды қамтитын экономикалық және ғылыми-техникалық өрлеуінің берік негізін қалады. Осы стратегиялық таңдау ауқымды өзгерістерге жол ашып, мемлекетіміздің тұрақты өсіп-өркендеуіне айрықша серпін беретіні анық. Қазіргі таңда барлық салада жасалып жатқан түбегейлі реформалардың мақсаты – бір. Біз Әділетті, Озық және «Таза Қазақстанды» құрып жатырмыз.