Қазығұрт асуында өрт шықты

Түркістан облысының Қазығұрт асуында өрт шықты. Республикалық маңызы бар «Алматы–Термез–Ташкент» автожолында тіркемесі бар жүк көлігі өртеніп, жалын сол аумаққа лезде тараған. Шамамен 1 гектар аумақтағы құрғақ шөп жанған. Төтенше жағдайлар депаратментінің мәліметінше, отқа оранған жүк көлігінде 22 тонна синтетикалық май болған. Жүк көлігі мен тіркемесі түк қалмай жанып кетті, майдың бір бөлігі жолға төгілген. Салдарынан көлік қозғалысы уақытша тоқтатылды. Оқиға орнына Түркістан облысы мен Шымкент қаласынан өрт сөндірушілер келіп, отты сөндірді. Зардап шеккендер жоқ.