Көшпенділер ойындары: Бүгінгі нәтиже

VI Дүниежүзілік көшпенділер ойындарында тағы да бірнеше жарыс түрінде жерлестеріміз олжалы болды. Жарыстың түскі сессиясында аударыспақ шеберлері 2 алтын, 1 күміс жүлде еншілесе, Қырчын аймағындағы бәсекелерде жерлестеріміз тағы да жеңімпаздар қатарынан көрінді. Абзал Тұлыбеков жамбы атудың «қырғыз стилінде» оқ бойы озық өнер көрсетіп, алтын жүлделердің санын үшеуге жеткізді. Таяқ тарту бәсекесінде Нұрсұлтан Есімбай үздік үштікті түйіндесе, Алыш бозкілемінде барын салған Нұрсұлтан Қожагелдіұлы қоланы қанағат тұтты. Түйе балуанымыз осыдан 2 апта бұрын «Қазақстан барысы-2026» бәсекесінде үшінші орынға табан тіреген еді.