Пойыз билеттерін сату тәртібі өзгеруі мүмкін

Елде тек әйелдер отыратын вагондар көбеюі мүмкін. Пойыз билеттерін сату жүйесіне өзгеріс енгізу жайы қарастырылып жатыр. Бұл мәселе әлеуметтік желі қолданушыларының ұсыныстарынан кейін көтерілген. Олар Түркиядағы тәжірибені мысалға келтірді. Онда бір-бірін танымайтын ер және әйел жолаушыларға бір купеден билет сатылмайды. Егер купедегі алғашқы орынды ер адам сатып алса, қалған орындар ер адамдарға ұсынылады. Әйел адам бірінші болып билет алса, купеге әйелдер орналастырылады. «Жолаушылар тасымалы» компаниясы мұндай жүйені Қазақстанда енгізу жайы зерттеліп жатқанын мәлімдеді. Алайда оны енгізу туралы нақты шешім әзірге қабылданбаған және жаңа тәртіптің қашан іске қосылатыны белгісіз.