Талдықорғанда IT мамандарын даярлауға арналған білім кампусы ашылды

Талдықорғанда жасанды интеллект пен бағдарламалау негіздерін үйрететін білім беру кампусы ашылды. Мұнда 15 жастан асқан тұрғындар тегін білім алып, теориядан гөрі практикалық тапсырмаларға басымдық беріледі. Алғашқы кезеңде қатысушылар бағдарламалаудың төрт тілін меңгеріп, кейін екі жылдық оқуға өтеді. Студенттер дайын жобалармен жұмыс істеп, техникалық және командалық дағдыларын дамытады. Екі жылда кампуста өңірдің 1400 тұрғынын оқыту жоспарланған. Мамандардың айтуынша, жоба жастардың IT саласында білім алып, халықаралық нарыққа шығуына мүмкіндік береді.

Талғат Абылаев, Jetisu IT-hub директоры:

Біздің мақсатымыз – IT саласын дамыту, әсіресе жастардың IT дағдыларын жетілдіру. Жыл сайын мұнда шамамен 2 мың адам тіркеліп, мыңнан астамы түрлі іс-шараларға қатысады. Балалар оқып, тәжірибе жинақтап, алты айдан кейін алған дағдыларын қолданып, халықаралық нарыққа шығып, тапсырыс ала алады.