Астана – инклюзивті туризмге жол ашқан қала

Астана ТМД елдері арасында алғаш боп Еуропалық қолжетімді туризм желісіне, яғни ENAT құрамына енді. Бұл елордада мүгедектігі бар тұрғындар мен қонақтардың жүріп-тұруына қолайлы орта қалыптасып келеді, - деген сөз.

Мәселен Астана әкімдігінің мәліметінше, соңғы жылдары қалада 750-ден астам аула, саябақ, сквер мен бульвар абаттандырылған. GreenLine бульвары, «Керуен» сквері, Бейбітшілік және келісім саябағы, спорттық жағалау мен Ататүрік саябағында ерекше қажеттілігі бар тұрғындардың еркін қозғалуына жағдай жасалған. Сондай-ақ қалада туристік нысандардың қолжетімділігі де тұрақты тексеріледі.

Айта кетейік, бұл жұмысқа мүгедектігі бар азаматтар мен қоғамдық ұйым өкілдері тартылған. 2024 жылы  200-ден астам қонақүй, музей, театр қызметкері мен экскурсовод арнайы оқудан да өтіпті. Содан бері туристік нысандардың ыңғайлылығы ұдайы қадағаланады. Мәселен биыл «Дос-Тәуелсіз өмір» орталығы мүгедектерінің қоғамдық бірлестігі 1 мың әлеуметтік инфрақұрылым нысанына мониторинг жүргізіп жатыр.. Қолжетімділік картасында қазірдің өзінде 1 500-ге жуық нысан туралы ақпарат бар. Алдағы уақытта инклюзивті бағыттар көбейіп, туристік нысандар мен қонақүйлердің жайлылығы арта түседі, - дейді әкімдік.