Шымкенттегі қоғамдық көлікке шағым көбейді

Шымкентте оқу жылы басталғалы қоғамдық көлікке қатысты жұртшылықтың шағымы көбейген. Әсіресе Тұран, Бозарық шағынаудандары мен Қайнарбұлақ тұрғын алабында автобустар лық толы. Оның сыртында  қозғалыс арақашықтығы ұзарып кеткен.  Ал жауаптылар жолаушы ағыны толық есепке алынбайынша, нақты көлік тапшылығын анықтау қиын екенін айтады. Себебі жеңілдікпен және тегін жүретін жолаушылар картасын валидаторға тіркемесе, олардың сапары электронды статистикаға түспейді.  Қазір қаладағы 83 әлеуметтік маңызы бар бағыттарға мыңға жуық автобус шығады, жыл соңына дейін тағы 200-ге жуық көлік қосу жоспарланған.

Автобустардың жетіспеушілігі немесе шамадан тыс жүктемесі туралы айтуға ресми цифрлық негіз жоқ. Маршруттар бекітілген кестеден +/- 15 минуттық рұқсат етілген ауытқу нормасында ғана жүреді. Жолаушылар ағынын есептеу үшін, маршрутты дұрыс ыңғайлау үшін бізге жеңілдік санатындағы азматтардың карточкасын қондырғыға тигізгендігі қажет екендігін айтқым келеді.