Қазақстан мен Корея сауда айналымын екі есе арттырмақ

Президент Қасым-Жомарт Тоқаев Сеулде Корея Республикасының Премьер-министрі Хан Сон Сукпен кездесті. Тараптар екі ел арасындағы сауда-саттықты екі есе арттырып, бірлескен өндірістерді көбейту мәселесін талқылады. Мемлекет басшысы 2027-2030 жылдарға арналған сауда-экономикалық және инвестициялық ынтымақтастық бағдарламасын әзірлеуді ұсынды. Сондай-ақ көлік-логистика, машина жасау, цифрландыру, жасанды интеллект және медицина салаларындағы ортақ жобалар сөз болды. Қазір Қазақстанда корей капиталының қатысуымен мыңнан астам кәсіпорын жұмыс істейді. Сонымен қатар Корея тарапы Алатау қаласын дамытуға атсалысуға ниетті екенін жеткізді.