Қалдықтарды қайта өңдеу көлемі артады

Қазақстанда қоқысты сұрыптау мен қайта өңдеуді дамытуға 122 миллиард теңгеден астам қаржы бөлінді. Кәдеге жарату төлемдері есебінен 34 жоба қолдау тапты. Жоспар бойынша, жылына 650 мың тонна қалдықты сұрыптайтын нысандар салынып, 435 мың тонна қалдықты қайта өңдеу қуаты дамытылады. Сондай-ақ 177 арнайы техника сатып алу көзделген. Қазірдің өзінде 15 жоба іске қосылып, 131 арнайы техника сатып алынған. Жаңа өндірістер қалдықты қайта өңдеу көлемін арттырып, полигондарға жіберілетін қоқысты азайтуға мүмкіндік береді.