Жер қойнауын пайдаланушылар ₸1,2 млрд салық төлемеген

Ақтөбе облысында жер қойнауын пайдаланушылар 1,2 миллиард теңге салық төлемеген. Бұл заңсыздықты табиғатты қорғау прокуратурасының қызметкерлері әшкереледі.

Тексеру барысында 2022-2025 жылдар аралығында жасалған 130-ға жуық келісімшарт бойынша салық толық көлемде төленбегені анықталды. 

Өз міндеттемелерін тиісті деңгейде орындамаған салық органдарының үш қызметкері тәртіптік жауапкершілікке тартылды. Ал жер қойнауын пайдаланушылар осы уақытқа дейін 600 миллион теңгеден аса қаржыны өтеген. Берешектің қалған бөлігін өндіру бойынша жұмыстар жүріп жатыр. Ал 29 компания 250 миллион теңгеге қосымша салық декларациясын өз еркімен тапсырған.