Мәжілістің жалпы отырысында биологиялық қауіпсіздік туралы заң қаралды

Берік Көшербай, тілші:
Биологиялық қауіпсіздік туралы заң Мәжілісте бірінші рет өткен жылдың соңында қаралған. Екінші оқылымға дейін депутаттар оның мазмұны мен сапасын жақсартатын бірқатар түзету енгізген. Жалпы алғанда, заң биологиялық қауіпсіздік саласы бойынша жауапты органдардың құзыретін нақты белгілеуге мүмкіндік береді. Құжатта қызметкерлерді әлеуметтік қорғау, мемлекеттік зертханалардың базасын жақсарту, биоқауіпсіздік саласында бірыңғай мемлекеттік ақпараттық жүйе құруға қатысты жұмыстың бәрі жазылған. Патогенді биологиялық агенттермен жұмыс істеуге рұқсат беру тетіктері көрсетілген. Адамдардың, жануарлар мен өсімдіктердің ауруы бойынша нақты қандай статистикалық және есептік деректердің артуы елдің биологиялық қауіпсіздігіне қауіп төндіретіні нақтыланған. Мәжіліс депутаттары заң жобасын екінші оқылымда мақұлдап, Сенат қарауына жіберді.