23 мың тонна марганец кенін заңсыз өндіргендер ұсталды

Ұлытау облысында марганец кенін заңсыз өндірумен айналысқандар ұсталды. Қаржылық мониторинг агенттігінің мәліметінше, Күдіктілер сырт көзге карьерде рекультивация жұмыстарын жүргізіп жатқандай кейіп танытқан. Алайда іс жүзінде мұнда ауыр техникалар мен арнайы жабдықтары бар толыққанды тау-кен байыту кешені жұмыс істеп тұрған. Өндірілген кен, тауарлық концентратқа айналдырылған. Кейін теміржол арқылы шекаралас мемлекеттерге экспортталыпты. Заңсыз өндірісті жүргізу үшін күдіктілер тіпті теміржол тұйығын жалға алған. Тергеу мәліметінше, осы уақытқа дейін 23 мың тоннадан астам өнім өткізілген. Оның жалпы құны бір миллиард теңгеден асады.

Күдіктілер пайдаланудан шыққан карьерді рекультивациялау жұмыстарын жүргізіп жатқан кейіп танытқан. Заңсыз әрекет салдарынан қоршаған ортаға залал келтірілген. Бүлінген жерлерді қалпына келтіру құны 150 млн теңгеден асады. Тергеу жалғасып жатыр.