«Алтын сапа» сыйлығына – 10 жыл!

Астанадағы Тәуелсіздік сарайында Президенттің «Алтын сапа» сыйлығын тапсыру рәсімі өтіп жатыр. Шараға Мемлекет басшысы Нұрсұлтан Назарбаев та қатысуда.

Биыл «Алтын сапа» сыйлығының тапсырыла бастағанына 10 жыл толып отыр. Еліміздегі кәсіпорындар мен өнім шығарушылардың жұмысына баға беретін жүлдені алу үшін 153 кәсіпорын өтініш берген. Ал, осыдан он жыл бұрын олардың саны нәбары 53 қана еді.

Сонымен қатар, шара барысында «Парыз-2015» сыйлығының иегерлерін марапаттау рәсімі де өтеді. Бұл сыйлық «Әлеуметтік жауапкершілігі ең жоғары кәсіпорын», «Еңбекті қорғау саласындағы ең үздік кәсіпорын», «Ең үздік ұжымдық келісімшарт» номинациялары бойынша марапатталса, осы сыйлық аясында тағы бір кәсіпорын «Экологияға қосқан үлесі үшін» «Парыз» сыйлығын иеленеді.

Ал «Алтын сапа» сыйлығы кәсіпорындар мен мекемелерге «Өндірістік мақсаттағы үздік кәсіпорын», «Халық тұтынатын тауарларды шығаратын үздік кәсіпорын», «Қызмет көрсету саласындағы үздік кәсіпорын» номинациялары бойынша беріледі. Одан бөлек шара барысында «Қазақстанның ең үздік тауары» көрме-байқауы өтіп жатыр. Оның да жеңімпаздары анықталады.