Түркістанда баласын 7 млн теңгеге сатпақ болған әйел ұсталды

Түркістан қаласында бір жасар баласын 7 млн теңгеге сатпақ болған әйел ұсталды. 27 жастағы келіншек бұл ойын алдымен нотариустардың біріне жеткізген. Алайда ол райынан қайтармақ болғанымен, күдікті көнбеген. Сондықтан нотариус полиция мен прокуратураға хабарлаған. Ақыры баланың анасы 7 млн теңгені алу кезінде қолға түсті. Тергеу барысында күдіктінің Төлеби ауданының тұрғыны екені анықталған. Түркістан қаласында жезөкшелікпен айналысып жүрген болып шықты. Ал, нәресте екі күн бойы ыстығы көтеріліп, үйінде қараусыз жатқан. Өкпесінің бір жағы қабынып, ауырған. Сондықтан ол дереу ауруханаға жатқызылған.

Ғалымжан Оңалбек, Түркістан қалалық прокуратурасының прокуроры:
Баласын сатпақшы болған Е есімді азаматша қазіргі таңда ұсталды. Ол кісіге қатысты ҚР Қылмыстық кодексінің 135-бабы 2 бөлігінің 12 тармағымен сотқа дейінгі тергеу амалдары жүргізілуде.

Әлібек Ақжігітов, Түркістан қалалық балалар ауруханасы бас дәрігерінің орынбасары:
Келген кездегі шағымдары дене қызуының жоғарылауы, ентігу. Үй жағдайында тырыспа болған. Алғашқы кезде көмек көрсетіліп, педиатрия 2 бөлімшесіне жатқызылды. Қазіргі уақытта жағдайы келгендегіден жақсы. Қанағаттанарлық десек болады.

Айнұр Ақбаева