Қостанайда қорқытып, ақша талап еткен күдіктілер ұсталды

Қостанайда бұрын сотталған 2 ер адам 5 млн теңгеге жуық ақша алу кезінде ұсталды. Тергеу мәліметтеріне сәйкес, олар қыркүйек айынан бері жәбірленушіні қорқытып, қажет болса күш қолданамыз деп, 17 миллион теңге талап еткен. Күдіктілерді Полиция департаментінің Экстремизмге қарсы іс-қимыл басқармасы және «Бүркіт» арнайы бөлімінің жасағы бірлесіп ұстады. Тінту барысында 4,4 миллион теңге, Kia Sportage автокөлігі және ұялы телефондар тәркіленді. Ер адамдардың әрекеттері алдын ала сөз байласып, қорқытып алушылық ретінде сараланды. Екі күдікті де тергеу изоляторына қамалып, сотқа дейінгі тергеп-тексеру басталды.