Ауғанстанда жүздеген аурухана жабылуға жақын

Ауғанстанда жүздеген аурухана жабылуға жақын. Себебі, оларды осыған дейін қаржыландырған донорлар «Талибан» үкіметімен жұмыс істеуге рұқсат ала алмай отыр. Мұны Дүниежүзілік денсаулық сақтау ұйымы мәлімдеді. Оның дерегінше, Ауғанстандағы 2300-дей емдеу мекемесінің 90 пайызы үстіміздегі аптада қызметін тоқтатады деген қауіп бар.

Айта кетсек, бұл мемлекетте тамыздың 15-де билік ауысты. Бүкіл елді басып алған тәліптер әзірге өзге әлеммен ресми байланыс орнатып үлгерген жоқ.

Рик Бреннан, Дүниежүзілік денсаулық сақтау ұйымының өкілі:
Проблема сол – Әлемдік банк, Еуропа одағы, ЮСАИД тәрізді ұйымдарға тәліптер билігі арқылы бұл мекемелерді қаржыландыруға рұқсат берілмей отыр. Сондықтан, донорлық көмек мәселесі кейінге қалдырылды. Үкіметтік емес ұйымдардың 15-і проблеманы шешу үшін Ауғанстан денсаулық сақтау министрлігіне хат жазды. Әзірге оңтайлы шешім жоқ.

Осы елден тағы бір мәлімет. «Рейтер» агенттігінің хабарлауынша, Ауғанстанда билікке тәліптер келгелі университтерде қыздар мен жігіттер бір-бірінен бөлек отыратын болды. Кейбір аудиторияларда олардың ортасына шымылдық құрылып жатыр.

Арыстан Рысбек