Елбасы Абу-Дабидің тақ мұрагерімен кездесті

Қазақстан мен Біріккен Араб Әмірліктері арасында инвестициялық қарым-қатынас артады. 6 миллиард доллардан асатын жобаларды дамыту үшін жақында ұзақ мерзімді құжатқа қол қойылған. Стратегиялық әріптестік одан әрі де жандана түспек. Елбасы Нұрсұлтан Назарбаев Абу-Дабидің тақ мұрагері, Біріккен Араб Әмірліктерінің Қарулы күштері Жоғарғы Бас қолбасшысының орынбасары, шейх Мұхаммед бен Заид Әл Наһаянмен кездесті. Тараптар елдер арасындағы дәстүрлі достық қатынастардың қарқынды дамып келе жатқанына жоғары баға берді. Кездесу барысында Қазақстанның Тұңғыш Президенті шейх Мұхаммед бен Заид Әл Наһаянға «Ядролық қарусыз әлем және жаһандық қауіпсіздік үшін Назарбаев сыйлығын» тапсырды.