Мемлекет басшысы қайтыс болған азаматтардың рухына құран бағыштау рәсіміне қатысты

Мемлекет басшысы Қасым-Жомарт Тоқаев кеше қаңтар оқиғасы кезінде қайтыс болған азаматтардың рухына құран бағыштау рәсіміне қатысты. Хазірет Сұлтан мешітінен халыққа үндеу жолдап, қаза тапқандардың жақындарына қайғыра көңіл айтты. Президент ел басына түскен сынақ мемлекет тұтастығына, ел қауіпсіздігіне қатер төндіргенін атап өтті. Салдарынан көптеген азамат қаза тапты.  

Қасым-Жомарт Тоқаев, Қазақстан Республикасының Президенті:

Сол қасіретті оқиғадан бері 40 күн өтті. Бүгін марқұмдардың рухына құран бағыштау үшін мешітке арнайы келдім. Қаза болған адамдардың жақындарына тағы да көңіл айтамын. Мемлекет қаралы шаңырақтарды қараусыз қалдырмайды. Мен қайтыс болған азаматтардың отбасыларына қаржылай көмек көрсетуді тапсырдым. «Қазақстан халқына» қоры да осы қайырымдылық жұмысқа атсалысады деп ойлаймын.