Украинадағы қазақстандықтардың жағдайы: Соңғы мәлімет

Украинаның әр түкпірінде әлі де отандастарымыз бар. Әсіресе жағдайы тұрақсыз Сумы қаласындағы жалғыз студентке елшіліктің көңілі алаң.

Жалпы, бүгін 175 азамат елге қайтарылды. Ал 2 сағаттай бұрын тағы 40 қазақстандық консулдық алдынан автобусқа отырып жолға шықты. Сондай-ақ 144 адам қазір Польша аумағында. Олар ертеңгі рейске дайындалып жатыр.

Мұның сыртында өз бетінше Львовқа келе жатқан 30-дай адам бар. Ондағы дипломатиялық корпус өкілдері жерлестердің аман-есен оралуына барынша жағдай жасап жатыр.

Дархан Қалетаев, Қазақстанның Украинадағы Төтенше және өкілетті елшісі:

Ана қалада бір отбасы, мына қалада 3-4 адам, тағы бір қалада 1 адам. Ең ауыр жағдай Сумы деген қалада бір студент баламыз бар. 19 жаста. Ең ауыр жағдайдың бірі сол. Қалғанын жан-жақтан шешіп жатырмыз. Одесса арқылы қазақстандықтар Молдоваға өтті. Елшілік қызметкерлері оларды Румынияға жіберіп жатыр.