Еуропалық Одақ Украинаға 500 млн еуро қаржылай көмек бөледі

Еуропалық Одақ Украинаға 500 млн еуро қаржылай көмек бөледі. Бұл туралы Люксембургта өткен Одаққа мүше елдердің сыртқы істер министрлерінің отырысында мәлім болды. Қаржы қару-жарақ сатып алуға және істен шыққан әскери техниканы жөндеуге бағытталмақ. Сондай-ақ, ЕуроОдақ 15 мың украиналық сарбазды қарт құрлық елдерінде оқытуға уағдаласты. Әскери жаттығулар қарашада Польша мен Германиядағы орталықтарда басталып, екі жылға созылмақ.

Жозеп Боррель, Еуропалық Одақтың сыртқы істер және қауіпсіздік саясаты жөніндегі жоғарғы өкілі:

Біздің басты мақсатымыз - Украинаны барынша қолдап, Ресейге қысым көрсету. Себебі, жаһан жұрты қазір осы соғыстың зардабын тартып отыр. ЕуроОдақ елдерінің Украинаның қарулы күштерін оқытып, жаттықтыруды жеке-жеке жүргізгеннен гөрі, күш біріктіруге келіскені де сондықтан.

Нұрсұлу Қасым