Tik Tok жобасы: Отандық IT стартаптарға қаржылай гранттар бөлінеді

Тикток компаниясы жергілікті стартаптарға арналған білім беру бағдарламасын ашты. Осы мақсатта қосымшаның жергілікті өкілдігі Астана хабпен бірге ынтымақтастық құрған. Бұдан былай жас IT мамандары өз жобаларын желіде ауқымды түрде танытып, тиімділігін арттыра алады.

Жуырда ғана 200-ден аса студент байқау іріктеуінен өткен. Олардың өнімдері қаржылық, ойын-сауық, денсаулық сақтау, білім беру сынды бағыттарға арналған. Енді олар өз өнімдерін тәжірибе жүзінде қолдану тетіктерін Тикток Академиясында меңгермек. Оқу соңында ең үздік таңдалған стартаптарға дұрыс стратегия мен маркетинг жасауына қаржылай гранттар бөлінеді.

Анастасия Панина, TikTok компаниясының Шығыс еуропа мен Орталық Азиядағы бас директоры:

Екі аптада біз үлгі ретінде платформа негізінде өз бастамаларын әу бастан енгізіп, кейін табысқа жеткен стартаптар жайында кеңінен хабардар ететін боламыз. Ең алдымен, бизнестегі тапсырмаларды сәтті орындауға қосымшаның шексіз мүмкіндігі мен маркетинг зор септігін тигізетінін ұмытпаған абзал.