Қазақстан киік мүйіздерін экспортқа шығаруы мүмкін

Елімізде киік мүйіздерін шетелге сату жағы қарастырылып жатыр. Бұл туралы Экология және табиғи ресурстар министрі Ерлан Нысанбаев мәлімдеді. Оның сөзінше, ақбөкеннің мүйізі дәрілік өнім ретінде шығыс медицинасында бұрыннан қолданылады. Алайда, халықаралық қауымдастық оны экспорттауға тыйым салған. Осыған байланысты министрлік қазір Женева қаласында СІТЕЅ Хатшылығымен кеңесіп жатыр. Рұқсат берілген бойда еліміз мүйіздерді экспорттауға кіріседі. Ресми жауап шамамен 2025 жылдың басында келеді,- деді министр.

Ерлан Нысанбаев, ҚР Экология және табиғи ресурстар министрі:

Ақбөкен мүйізінен Шығыс елдері, негізінен Қытай дәрі-дәрмек әзірлейді. Қазір келіссөз жүріп жатыр. Оған дейін мүйіздер «Охотзоопромның» арнайы орындарында таңбаланып, сақталады. Қазір ешқайда сатып жатқан жоқпыз. Бірақ болашақта сыртқы нарыққа экспорттауды жоспарлап отырмыз.

Айя Мүтәлі