Қостанай облысында қазандық жарылды

Қостанай облысы Амангелді ауылында Мәдениет үйінің қазандығы жарылып, артынша ғимарат опырылып құлаған.

Куәгерлердің айтуынша, жарылыс кезінде іште екі адам болған. Бірі от жағушы, екіншісі шаруашылық меңгерушісі. От жағушы шығып үлгерген. Ал үйінді астында қалған 55 жастағы ер адамды құтқарушылар алып шығып, жедел жәрдем қызметкерлеріне тапсырды. Оқиға орнында төтенше жағдайлар қызметкерлері, полиция және жергілікті атқарушы органдар жұмыс істеп жатыр. Апат салдарынан көп қабатты үш тұрғын-үй мен екі әкімшілік ғимарат жылусыз қалды. Жергілікті мамандар жылу батареяларының қату қауіпі жоқ, қалпына келтіру жұмыстары жедел жүріп жатқанын жеткізді.

Дәуренбек Әбдібек