Қайтарылған актив: Ақтауда жедел медициналық жәрдем станциясы салынады

Мемлекетке қайтарылған активтер есебінен Ақтауда жаңа жедел-жәрдем стансасы салынады. Облыстық нысан жылына 100 мың шақыртуды қабылдауға қауқарлы болмақ. Бұл жоба үшін Үкімет мемлекеттік қордан 4,6 млрд теңге бөлді. Облыстық жедел және шұғыл медициналық жәрдем стансасы құрылысына 2,6 гектар жер учаскесі бөлінді. Ішінде оқу-симуляциялық орталығы, сондай-ақ, 20 санитарлық автокөлікке арналған жөндеу және жуу базасы болады. Бүгінде Ақтауда 200 мыңға жуық адам тұрады. Аймақ бала туу көрсеткіші бойынша көш бастап тұр. Соңғы 7 жыл ішінде қалада 10 жаңа шағын аудан салынды. Сондықтан соңғы үлгідегі жедел жәрдем стансасы халыққа аса қажет.

Бибізада Дүйсенбаева, Маңғыстау облысы денсаулық сақтау басқармасы басшысының орынбасары:

Осы жедел-жәрдем стансасының ашылуының арқасында біздің күрделі 3 мәселеміз шешіледі. Тұрғындарға көмек-көрсету уақытын азайтады. Бұрын соңды болмаған жедел-жәрдем стансасы орталығы болады. Үшіншіден 75 пайыз тозып кеткен техника мен автокөліктердің жаңартылуын осы жаңа объектінің құрылысымен байланыстырып отырмыз.

Ақниет Балтанова