Қанның қатерлі ісігімен тіркеуде тұрғандар донорға мұқтаж

Сүйек кемігі трансплантациясы бойынша елде 16 ота жасалған. Ал 8 мыңнан астам адам қанның қатерлі ісігімен тіркеуде тұр. Бұл туралы Астанада өткен «Әрбір қан тамшысындағы өмір» акциясында белгілі болды. Шара Дүниежүзілік балалар обырына қарсы күрес күніне орай өтті. Мамандар шара барысында дәріс өткізді. Мақсат – қоғам назарын сүйек кемігі донорлығына аудару. Бүгінде жыл сайын 1,5 ымңға жуық жаңа жағдай анықталады. Олардың 600-і балалар. 2011 жылы құрылған регистрде 12 742 донор тіркелген.

Жанар Алиева, ҚР Денсаулық сақтау министрлігі Ана мен бала денсаулығын сақтау департаментінің бас сарапшысы:

Біздің онколог мамандарымыз бұл ауруды емдей алады. Тек қана бізде донордың аз болуына байланысты науқастар ұзақ күтіп қалады. Донорлардың саны көбейіп, егер науқас адамға олардың қаны, олардың сүйек кемігі сәйкес келіп жатса, онда бізге жақсы болар еді, дәрігерлер қауымына. Өйткені бұл донорға ешқандай зиянды әсер етпейді. Ал рецепиентке ол үлкен көмек.

Темірлан Нұрсолтан