Шымкентте ұн бағасын негізсіз қымбаттатқандар анықталды

Шымкентте ұн өндіру және сатумен айналысатын бірнеше ірі компания өзара сөз байласу арқылы қолдан қымбатшылық ұйымдастырған.

«Green House», «Санжар», «Пионер» және «Green Product» кәсіпорындарының жұмысына тексеріс жүргізген Бәсекелестікті қорғау және дамыту департаментінің мамандары олардың 1-сұрыпты ұн бағасын әдейі қымбаттатқанын анықтады.

Тауар өндірушілердің бұл әрекетін айғақтайтын дәлелдер жинақталып, іс сотқа жолданды. Кәсіпорындар түрлі жаза арқалап, мемлекетке қомақты айыппұл төлейді.

Ернар Қосбаев, Бәсекелестікті қорғау және дамыту департаментінің басшысы:

Тексеру нәтижесінде бұл фактілер дәлелденді. Аталған мекемелердің заңсыз әрекеттерін сот кінәлі деп тауып, оларға тиісті жаза тағайындалды. Сонымен қатар заңсыз тапқан табыстары мемлекет пайдасына тәркіленді.

Ғани Қалмаханов