11 боксшы мерзімінен бұрын жүлдегер атанды

Бокстан Әлем Кубогына қатысып жатқан қазақстандық 11 боксшы мерзімінен бұрын жүлдегер атанды. Өйткені олар бәсекенің жартылай финалына жолдама алған. Тағы 5 былғары қолғап шебері ширек финалда бақ сынайды. Астанада өтіп жатқан жарыстың басталғанына 5 күн болды, бүгін боксшылар тек кешкі сессияда жұдырықтасады. Ел намысын 5 отандасымыз қорғайды. Әйелдерден 51 келіде Алуа Балқыбекова, 65 келіде Аида Әбікеева және ерлерден 65 келіде Ертуған Зейнуллинов жартылай финалдың, әйелдерден 80 келіден жоғары салмақта Елдана Талипова, ерлерден 90 келідегі Сағындық Тоғамбай финалдың жолдамасына таласады. Жекпе-жектерді сағат 19:00-де «Qazsport» телеарнасы тікелей эфирде көрсетеді. 

Асылбек Данияр