$75 млн табыс: Қазақстан үш елге ғарыш аппаратын экспорттайды

Қазақстан үш елге ғарыш аппаратын экспорттайды. Бұл арқылы мемлекет 75 млн доллар табыс табады деп көзделуде. Ғарыш аппараты жеткізілетін елдер тізімінде Нигерия, Конго және Моңғолия бар. Қазір алты ғарыш аппаратын құрастыру жүріп жатыр. Оның ішінде жерді қашықтан зондтауға арналған оптикалық спутник және жер бетін сканерлейтін ғарыш аппаратының түрлері бар. Бұл құрылғылардың көмегімен жер бетін ғарыштан әртүрлі әдіспен түсіріп, ақпарат алуға болады. Жерсерік жердің жағдайын тиімдірек бақылауға, су ресурстарын басқаруға және қоршаған ортадағы өзгерістерді талдауға мүмкіндік береді.

Мәлік Олжабеков, Цифрлық даму, инновациялар және аэроғарыш өнеркәсібі вице-министрі:

Конго, Нигерия және Моңғолия елдерімен үш келісімшарт бар. Бұл жерде осы экспорттық келісімшарттар бойынша жалпы мәліметті айта аламын. Өйткені келісімшарт талаптары бойынша әр спутниктің құнын жариялауға болмайды. Менің бағалауым бойынша, бұл үш спутниктің жалпы құны 70-75 миллион доллар шамасында бағаланады.

Самал Қабышева