«Достық – Мойынты» теміржолының екінші желісі іске қосылды

«Достық – Мойынты» теміржолының екінші желісі іске қосылды. Жүк тасымалын 5 есе арттыруға мүмкіндік беретін жол торабын Президент өзі ашты.

Теміржол құрылысы 3 жылға жалғасып, уақытынан бұрын тапсырылды. Мемлекет басшысы алдағы уақытта бұл салаға цифрландыру және жасанды интеллект технологиясын енгізе отырып, оны ел экономикасының озық бағыты ретінде дамыту көзделгеніне назар аударды. Еліміз үшін «Бір белдеу, бір жол» жаһандық жобасының мән-мағынасы да айрықша. Логистика саласындағы жобалар жалғаса береді. Қазірдің өзінде Қазақстан Еуразиядағы басты транзит хабының біріне айналған.

Қасым-Жомарт Тоқаев, Қазақстан Республикасының Президенті:

Қазақстан солтүстік пен оңтүстікті, батыс пен шығысты жалғап тұр. Жеріміз арқылы 5 теміржол дәлізі өтеді. Оның бәрі әлемнің ең ірі сауда нарықтарына жол ашады. Біз көлік-логистика инфрақұрылымын дамытуға баса мән береміз. Соңғы он жылда осы салаға шамамен 35 миллиард доллар инвестиция салынды. Мен халыққа Жолдауымда бірқатар жобаны уақытылы жүзеге асыру туралы нақты тапсырма бердім. Алдағы уақытта 5 мың шақырым теміржол салу жоспарланып отыр. Сондай-ақ 11 мың шақырым теміржол жөнделеді.