Зеленский: Территория - келіссөздердегі ең күрделі мәселе

Украинадағы соғысты тоқтату жөніндегі келіссөздерде шешімі қиын үш басым бағыт бар. Олар – территория мәселесі, қауіпсіздік кепілдігі, қорғанысқа және елді қалпына келтіруге қаражат. Мұны Парижге сапарында президент Владимир Зеленский мәлімдеді.

Бірер күн бұрын Украинада бейбітшілік орнату жоспары Женевада, Флоридада талқыланып, біршама өзгертілді. Франция президенті Эммануэль Макронмен өткен баспасөз маслихатында Зеленский бұл жоспар әлі келісіліп жатыр және оның сипаты бұрынғыдан жақсырақ деді.

Айта кетейік, жаңартылған жоспарды Ресейге ұсыну үшін бүгін Мәскеуге АҚШ президентінің арнайы өкілі Стив Уиткофф аттанады.