БҚО-да жалпы өңірлік өнім көлемі 5 трлн теңгеге жетті

Сонымен қатар Президент Батыс Қазақстан облысының әкімі Нариман Төреғалиевті қабылдады. Кездесуде өңірдің әлеуметтік-экономикалық дамуы талқыланды. Аймақтың жалпы өңірлік өнімі соңғы үш жылда 13,6 пайызға өсіп, 5 триллион теңгеге жеткен. Өткен жылы облысқа 874,5 миллиард теңге инвестиция тартылған. Қарашығанақ кен орнында қуаттылығы жылына 5 миллиард текше метр газ өңдейтін зауыт құрылысы басталады. Жобаның құны 1,7 триллион теңге. Сондай-ақ жыл соңына дейін Жайық өзені арқылы өтетін көпір құрылысы басталмақ.

Нариман Төреғалиев, Батыс Қазақстан облысының әкімі:

Соңғы үш жылда облыста жалпы құны 138 миллиард теңге болатын 121 әлеуметтік нысан салынып, мың жарым шақырым жол жөнделген. Жалпы құны 7,6 млрд құрайтын төрт вокзал жаңғыртылып, ел игілігіне берілді. Президентке ауыл шаруашылығы, энергетика және коммуналдық секторды жаңғырту бойынша атқарылған жұмыстар бойынша толық мағұлмат бердім. Президент өңірді одан әрі дамыту, коммуналдық инфрақұрылымды жаңғырту және тұрғындардың тұрмыс сапасын арттыру бойынша бірқатар нақты тапсырма берді.