ІІМ: Кейбір жүргізушілерге жылдамдық бойынша қате айыппұл келген

Кейбір қазақстандықтарға жылдамдық бойынша негізсіз айыппұл келген. Ішкі істер министрлігінің хабарлауынша, ол техникалық себептерге байланысты қате рәсімделген. Нақтылай кетсек, 13-14 тамыз аралығында Бас прокуратураның «ЕРАП» ақпараттық жүйесінде нұсқамаларды автоматты түрде қалыптастыру кезінде ақау болған. Салдарынан орташа жылдамдықты асырудың кейбір дерегі бір сәттік жылдамдықты асыру ретінде тіркелген.

Мұрат Қабденов,ҚР ІІМ әкімшілік полиция комитетінің төрағасы:

Жүргізушілерге айтарымыз: ешқайда барудың, полицияға жүгінудің немесе дәлелдеудің қажеті жоқ. Қате қалыптастырылған барлық нұсқама анықталды және олар автоматты түрде жойылады. Тағы да атап өтеміз: мәселе тек тасжолдарда аталған техникалық ақаудың салдарынан қате рәсімделген айыппұлдар туралы болып отыр. Ал мұндай айыппұлдарды төлеп қойған жүргізушілерге қаражатты қайтару мәселесі қазір пысықталып жатыр.