Мектептердегі қауіпсіздік шаралары күшейтіледі

Жаңа оқу жылы қарсаңында мектептегі қауіпсіздік шаралары күшейтіледі. Премьер-министр Олжас Бектенов әкімдіктерге мектеп жанындағы жол инфрақұрылымындағы кемшіліктерді жоюды, сондай-ақ білім беру нысандарының өрт және терроризмге қарсы қауіпсіздігін тексеруді тапсырды. ІІМ «Назар аударыңыз, балалар!» шарасы аясында бұрын берілген нұсқамалардың орындалуын тексереді. Іс-шаралар қыркүйек соңына дейін жалғасады. Сонымен қатар Үкімет басшысы жыл соңына дейін барлық мектептегі бейнебақылау камераларын ІІМ-нің жедел басқару орталықтарына қосуды тапсырды. Қазір бұл жұмыс жеті өңірде толық аяқталған. Қалған облыстарға жұмысты жеделдету міндеттелді.