Басты Жаңалықтар Оралда жаңа үлкен көпір салына бастады

Оралда жаңа үлкен көпір салына бастады

18.08.2026 17:22

Оралда «Ақжайық» шағын ауданы мен қала орталығын байланыстыратын жаңа көпір құрылысы қарқын алды.

Жаңа өткел Шаған өзені арқылы өтеді. Жолымен қосқанда әлеуметтік нысанның ұзындығы 4 шақырым, көпірдің ені 14 метр. Өткел төрт жолақты болады. Тұрғын саны 150 мыңға көбейетін Зачаган кентінің халқы қазір қала орталығына жалғыз көпір арқылы қатынайды. Жаңа өткел салынса, тұрғындар орталыққа қазіргідей 1 сағатта емес, 15 минутта жете алады. Жоба құны 36 млрд теңгеге жуық. Құрылыс 2028 жылы аяқталмақ.

Нариман Төреғалиев, БҚО әкімі:

Жолдың профилін шығарды. Енді қазір мына жерде 134 қада соғылады. Тереңдігі 15-18 метрден. Осының барлығымен қоса, мына 4,3 шақырым жерге топырақ төселеді. Себебі мына жерде өзеннің поймасы бар. Сондықтан жаңа таза топырақ әкелініп төселеді.

Бұдан бөлек «Ақжайық» шағын ауданында 70 көпқабатты тұрғын үй, 4 балабақша, 1500 орындық үш мектеп, жаңа аурухана, емхана, перинаталды орталық, 12 мың орындық стадион – барлығы 60 әлеуметтік нысан бой көтермек. Қазір баспана кезегінде тұрған оралдықтарға 1200 пәтер салынып жатыр. Жыл соңына дейін 9 үй тапсырылады.

Нұркен Молдашев, БҚО құрылыс басқармасының басшысы:

12 участокте бір стильде үйлер салынып жатыр. 5 қабатты жаңа жобада. Оның өз ерекшеліктері бар. Видеодомофон, кондиционерге корзиналар, фиброцементтік панель, аллюминий есіктер деген сияқты, басқа да ерекшеліктерімен салынып жатқан үйлер.

Автор

Ардақ Мұратқызы

Бөлісу