Фельдшер Ұ.Мырзуан ісі: Жәбірленуші тарап тыңдалды

Астанада қызмет барысында қаза тапқан жедел жәрдем фельдшері Ұлдана Мырзуанға қатысты кезекті сот отырысы өтті. Бүгін жәбірленуші тарап тыңдалды. Марқұмның жолдасы Әділет Зейнел жерлеу рәсімінен кейін оны бірден жергілікті әкімдік шақырып, 20 миллион теңге табыстағанын айтты.

Оның айтуынша, бұл қаржының басым бөлігі Ұлданың атындағы автокөлік несиесін төлеуге жұмсалса, 4 жарым миллионы Ұлдананың анасына, ал қалғаны құрбан шалуға кеткен. Отырыста марқұмның анасы да тындалды. Ол қайғылы оқиға болған күнді баяндады. Қызының соңғы сөздерін есіне алып, «Сол күні қайта хабарласам деген еді» деп, көз жасын тыя алмады. Судья әйелдің жағдайын ескеріп, үзіліс жариялады.