Жаңбыр соңы қарға ұласады, кей өңірлерде +35 градус болады

Жаздың соңғы күндерінде ел аумағында ауа райы күрт құбылады. «Қазгидромет» мамандарының мәліметінше, елдің кей аймақтарында жаңбыр соңы сулы қарға ұласуы ықтимал. Ал бірқатар өңірде ауа температурасы 35 градусқа дейін көтеріледі.

25-27 тамызға арналған ауа райы болжамына сәйкес, елдің солтүстік және шығыс өңірлерінде күн райы тұрақсыз болады. Найзағай ойнап, жаңбыр жауады. Кей аудандарда нөсер жаңбыр, бұршақ және дауыл болуы мүмкін. 26-27 тамыз күндері түнде еліміздің шығысы мен оңтүстік-шығысындағы таулы аймақтарда жаңбыр соңы сулы қарға ұласуы ықтимал. Ал Қазақстанның батысы мен оңтүстігін жауын-шашынсыз. Солтүстік, орталық және оңтүстік өңірлерде ауа температурасы 25-35 градусқа дейін ыстық болады деп болжайды.