Әзербайжан Қазақстан халқына көңіл айтты

Әзербайжанның Сыртқы істер министрлігі Каспий теңізіндегі оқу-жаттығу кезінде қаза тапқан қазақстандық әскери қызметшілердің жақындарына және Қазақстан халқына көңіл айтты.

«Қазақстан Әскери-теңіз күштерінің Каспий теңізіндегі оқу-жаттығуы кезінде адамдардың қаза тапқаны туралы хабарды терең қайғырып қабылдадық. Қаза тапқан әскери қызметшілердің отбасылары мен жақындарына, сондай-ақ бауырлас Қазақстан халқына және Үкіметіне көңіл айтамыз. Алла қаза болғандарға мәңгілік тыныштық беріп, олардың отбасыларына осы қиын-қыстау кезеңде күш-қуат пен сабыр берсін. Хабар-ошарсыз кеткендердің аман-есен табылуына үміт артып, жараланған әскери қызметшінің тезірек сауығып кетуін тілейміз», – делінген хабарламада.

Сондай-ақ Иран Ислам Республикасының Ақтау қаласындағы Бас консулдығы Каспий теңізінде қаза тапқан әскери қызметшілердің қайтыс болуына байланысты көңіл айтты.