Көлік, әуе, кеме бағыты цифрландырылуда

Елімізде жаңа теміржол желілерін салу бойынша ауқымды жобалар қарқынды жүзеге асырылып жатыр. Мәселен, соңғы бес жылда 911 шақырым  темір жол салынды, тағы 800 шақырым темір жолдың құрылысы жүргізілуде.

Әуе қатынасында да жаңа мүмкіндіктер ашылды. Биыл Арқалық әуежайы қалпына келтіріліп, Астана, Алматы және Қостанай қалаларымен әуе қатынасы жаңданды. Жыл соңына дейін Зайсан, Катонқарағай және Кендірлідегі жаңа әуежайлардың құрылысын аяқтау көзделген. Ел ішіндегі әуе рейстерінің саны 630-дан 890-ға дейін артты.

Президент тапсырмасына сәйкес, жол-көлік, әуе, кеме бағыттарына цифрлық технологиялар енгізіліп жатыр. Мысалы, пойыздардың қозғалысын бақылайтын GPS-трекерлер  іске қосылды. Сондай-ақ, шалғай аймақтарда да пойыз ішінде базалық интернет пакетін пайдалану мүмкіндігі қарастырылмақ. Қазақстан, Әзербайжан және Грузияның теміржол жүйелері арнайы платформа арқылы «бір терезе» қағидаты бойынша интеграцияланды. Ал жаңа технология көмегімен кедендік рәсімдеу процесі қағазсыз жүргізіледі. Нәтижесінде бұл процесс 8 сағаттан 30 минутқа дейін қысқарды. Ал Қытайдан Грузия мен Түркия порттарына жүк жеткізу мерзімі 38 тәуліктен 17 тәулікке дейін азайды.