Үкімет отырысында бизнестегі ахуалға, кәсіпкерлікке мән берілді

Үкіметтегі жиында Елбасы бизнестегі ахуалға, кәсіпкерлікке үлкен мән берді. «Үкімет жоспарлы тексерістердің тоқтатылғаны жөнінде баяндайды. Бірақ, тексеруші органдар қызметкерлерінің саны іс жүзінде қысқарған жоқ»,- деді. Ол рас. Дүркін-дүркін тексерістен әбден діңкелеген кәсіпкерлер бекерден-бекерге шағымданбайды. Аш кенедей жабысып, жан-жақтан жұлмалайтын тексеруші органдар әлі де бар. Оның үстіне көлеңкелі бизнеске де тосқауыл болмай тұр. Салықтан жалтарған «Шығайбайлар» миллиардтаған қаржыны қалтаға басып немесе шетел асырып отыр. Жалпы ішкі өнімнің 15-20 пайызына татитын қыруар қаржы осы көлеңкелі экономиканың көмейіне кеткен.

Енді жауапкершілік туралы. Биліктің биік мінберінде жүрген министрлердің жауапкершілігі. Елбасы олардың бұйрық шығару, шешім қабылдауға келгенде ат-тондарын ала қашатындарына қынжылды.