Асқар Мырзахметовтың өңірді өркендетуге тәжірибесі жеткілікті

Сәрсенбі күні Жамбыл облысына жаңа басшы тағайындалды. Өңірге Асқар Мырзахметов әкім болып барды. Елбасының Жарлығын өңір жұртшылығына Премьер-Министр Бақытжан Сағынтаев пен Президент әкімшілігінің жетекшісі Әділбек Жақсыбеков таныстырды.

Үкімет басшысы облыс активінің алдында өңірді 5 жылға жуық басқарған бұрынғы әкім Кәрім Көкірекбаевтың жемісті еңбек еткенін атап өтті. Ал, жаңа басшының өңірді өркендетуге тәжірибесі жеткілікті. Асқар Исабекұлы мемлекеттік қызмет жолында шыңдалған. 6 жылдан аса Оңтүстік Қазақстан облысын басқарды. Одан кейін «Нұр Отан» партиясы төрағасының бірінші орынбасары, ҚР Премьер-Министрінің орынбасары – Ауыл шаруашылығы министрі қызметтерін атқарды. Жаңа әкімнің алдында мемлекеттік бағдарламаларды жүйелі жүзеге асыру міндеті тұр.