Рудныйда 330 миллион теңгеге салынған аттракцион қайта бұзылмақ

Қостанай облысының Рудный қаласында 330 миллион тенгеге былтыр салынған аттракцион кәдеге аспай, ақыры қайта бұзылатын болды. Ауданаралық экономикалық сот осындай шешім шығарды. Себебі нысан адам өміріне қауіпті. Шолу дөңгелегінің кабиналары биікке көтерілгенде желмен қаңбақша қаңғалақтап, өздігінен шыр айналған. Мұны кездейсоқ куәгерлер телефон камерасына түсіріп алған. Соны негізге алып белсенділер сотқа шағымданған. Енді сот шешіміне сәйкес, тапсырыс беруші мен мердігер шолу дөңгелегін бөлшектеп, алып тастауға міндеттелді. Облыстық экономикалық соттың үкімі осындай. Алайда, сапасыз әрі қымбат аттракционды орнатқандар мен осы жұмысты қабылдап алғандар жауапқа тартылған жоқ.

Дәуренбек ӘБДІБЕК