Малы өлген Үржар ауданындағы шаруалар өтемақы алатын болды

Шығыс Қазақстан облысындағы Көктал ауылында малы қырылып қалған тұрғындарға өтемақы берілетін болды. Облыс әкімі Даниял Ахметов осындай шешім шығарды. Мәселен, бір апта бұрын Үржар ауданы Көктал елді мекенінде белгісіз індеттен 250-ден астам сиыр өліп қалды. Тұрғындар біздің арна тілшілеріне хабарласқан болатын. Мәселе ұлттық арнадан көрсетілген күннің ертеңінде облыстан арнайы комиссия тексеріс жүргізді. Халық шығын болған мал үшін өтемақы төлеуді сұраған. Нәтижесінде, үлкен мал үшін 250 мың, бір жасар сиырға 150, ал биылғы төлдерге 50 мың теңгеден өтемақы берілетін болды. Алайда ауылда малдың аурудан өлуі әлі тоқтаған жоқ. Қандай індет екендігі де әлі белгісіз.

Ержан ЖАҚЫП