Басты Жаңалықтар Жол-көлік апатынан бес адам қаза тапты

Жол-көлік апатынан бес адам қаза тапты

05.06.2014 09:30

Оңтүстік Қазақстан облысында ірі жол-көлік апаты болды. Төле би ауданындағы «Леңгір-Екпінді» тасжолында екі жеңіл көлік соқтығысып, бес адам қайтыс болды.

Қайғылы оқиға түнде сағат 00.00 шамасында болған. Облыстық Ішкі істер департаменті баспасөз қызметінің мәліметінше, «Volkswagen Vento» көлігінің 23 жастағы жүргізушісі тізгінге ие бола алмай, қарсы бетте келе жатқан жеңіл көлікке соғылған.

Қатты соққыдан «Audi» көлігінің ішіндегі ерлі-зайыптылар мен 15 жастағы бала, сондай-ақ 1968 жылы туған жолаушы оқиға орнында тіл тартпай кетті.

Ал, жол апатына себепкер жүргізуші ауруханада қайтыс болды. Қазір жол-көлік апатының себеп салдары жан-жақты анықталуда.

Салтанат Қаракөзова, ОҚО ІІД баспасөз қызметінің жетекшісі:

Бұл ірі жол-көлік оқиғасына қатысты қазір жан-жақты тергеу амалдары жүргізіліп жатыр. Қылмыстық іс қозғалды. Жол қозғалысы тәртібін өрескел бұзу және транспортты басқару бабы бойынша. Түрлі сараптамалар тағайындалды. Тергеу жүруде.

Айнұр АҚБАЕВА

Автор

Айнұр Ақбаева

Бөлісу