Қазақтың белгілі ақыны Есенғали Раушанов өмірден өтті

Қазақтың ақыны Есенғали Раушанов дүние салды. Ақынның қазасына байланысты мемлекет басшысы Қасым - Жомарт Тоқаев марқұмның отбасына көңіл айтып, жеделхат жолдады.

Осыған өзгеше ақын Facebook-те Айт-Ман Нұржан деп қол қоятын Светқали Нұржан былай деп жоқтаса:

Уа, көшті!

Көшті деймін Есен ағам,

Сумиып қала барды көсе-ғалам...

Не айта алам, Көкмойнақ-жыр түн ішінде,

Кісінеп: «Ием қайда?» - десе маған?..

Талантты ақын Серік Ақсұңқар:

Терісіне тер сіңбей,

О да кетті мына жерді жерсінбей.

Біздің ел де қызық ел ғой, жүретін

Жетесізі-жетелісін теңсінбей! – деп күңіренді.

Есенғали Раушановты Әбіш Кекілбаев былай деп бағалаған екен:

«Жүрісі-тұрысы нар тайлақ сияқты болғанымен, бойында көш бастайтын көсем түйенің мінезі бар. Шаңырақ артсаң – шақпайтын, кебеже артсаң – сындырмайтын, тең артсаң – түсірмейтін, алтын артсаң да ауырсынбайтын қазақтың нағыз атанжілік ақыны».

Адам өмірінен қымбат ешнәрсе жоқ. Жаратқанның алдында бәріміз бірдейміз. Дегенмен ерек таланттардың тастап кететініне ішің ашиды...