Ақтөбе облысында боранның салдарынан 300-ге жуық жолаушы құтқарылды

Ақтөбе облысында кешелі бері ақ түтек боранның салдарынан жолда қалған үш жүзге жуық жолаушы құтқарылды. Әйтеке би ауданының Қарабұтақ ауылы маңында төрт автобус тұрып қалған.

«Шымкент-Мәскеу» бағытымен жолға шыққан көліктерде қазақстандық жүргізушілерден бөлек Өзбекстан мен Тәжікстанның 220 азаматы болған. Олардың бәрі Қарабұтақ ауылындағы орта мектепке аман-есен жеткізілді. Зардап шеккендер жоқ. Сондай-ақ құтқарушылар Мұғалжар ауданының Жарық ауылынан жүкті әйелді аудандық ауруханаға жеткізді. Ал Алға ауданы аумағында Самара-Шымкент тас жолының бойында қалған 20 адам Маржанбұлақ ауылындағы кемпингке орналастырылды. Мәртөк, Хромтау аудандарында да ондаған адам құтқарылды.

Жақсыбек Кемал