БҚО тұрғындарына ыстық күндері орманға баруға тыйым салынды

Батыс Қазақстан облысы тұрғындарына ыстық және желді күндері орманға баруға тыйым салынды. Бұл туралы облыс әкімдігінің тиісті қаулысы шықты. Арнайы техникалар болмаса, таңғы сағат 10-нан кешкі 9-ға дейін орман-тоғай маңында көлік қозғалысына шектеу қойылды. Өйткені аймақта өрт қаупі жоғары болып тұр. Жыл басынан бері орманда екі өрт оқиғасы тіркеліп, 219 гектар жер отқа оранды.

Қайрат Есенғалиев, «Орал орман және жануарлар дүниесін қорғау жөніндегі» КММ директоры:

Орман өрті қауіпсіздігі V категория болған кезде орманға кіруге шектеу қойылады. Ауа температурасы 30 градустан жоғары көтерілгенде, желдің жылдамдығы 15 м/секундқа дейін ұлғайғанда өртті сөндіру өте қиын және оның зардабы өте үлкен.

Ардақ Мұратқызы