Заңсыз жүрген 40 гастарбайтер елімізден шығарылды

Қазақстан аумағында заңсыз жүрген 40 гастарбайтер елден шығарылды. Бұл Алматының көші-қон полициясы жүргізген 3 күндік тексеріс нәтижесінде анықталғандары. Құзырлы орган үш күн ішінде мегаполисте көші-қон заңнамасын бұзудың 405 дерегін тіркеген. Оның 281-ін шетел азаматтары жасаған. Сондай-ақ шетелдіктердің елімізде болу заңдылығын қамтамасыз ету шараларын қолданбағаны үшін 115 отандасымыз әкімшілік жауапкершілікке тартылған.

Асхат Бутунчинов, Алматы қаласы ПД көші-қон қызметі басқармасының бастығы:

Жұмыс беруші тоғыз отандасымыз шетелдік жұмыс күшін тарту тәртібін бұзған. ПД-нің қабылдап-таратуына жеке басын куәландыратын құжаты жоқ 192 шетелдік орналастырылды. Сонымен қатар іс-шара барасында заңсыз көші-қон арналарын ұйымдастыру бойынша 5 қылмыстық іс тіркелді.

Нұрсұлтан Тілектес