Басты Жаңалықтар Елде 200 мыңнан аса азамат тұрғын үй кезегінен шығарылады

Елде 200 мыңнан аса азамат тұрғын үй кезегінен шығарылады

08.08.2023 21:10

200 мыңнан аса азамат тұрғын үй кезегінен шығарылмақ. Қазір бұл тізімде 647 мыңға жуық қазақстандық бар. 10 жылда кезекте тұрғандар саны 6 есе өскен. Негізі, жергілікті әкімдіктер баспанаға мұқтаж жандардың тізімін жыл сайын жаңартып отыру тиіс. Биыл бұл іске индустрия және инфрақұрылымдық даму министрлігі кірісті. Олар цифрлық даму, инновациялар және аэро-ғарыш өнеркәсібі министрлігімен бірлесіп, арнайы сараптама жүргізген. Бірқатар мемлекеттік органның ақпараттық базасын біріктіру нәтижесінде кезектегі 96 мың адамның соңғы 5 жылда, үйлі болғаны белгілі болды. 500-ден аса үміткердің азаматтығы болмай шыққан. 91 мың адам өзге аймақтарға көшіп кетіпті. Ал 29 мың азамат тұрақты түрде тіркелмеген. 15 мың адам қайтыс болған. Бірақ ешқайсысы тұрғын үй кезегінен алынбаған.

Бауыржан Қабдол, ҚР ИИДМ Құрылыс және ТҮКШ істері комитеті төрағасының орынбасары:

Әкімдіктер жыл сайын тұрғын үйге мұқтаж жандардың тізімін жаңартып отырады. Себебі азаматтардың көбі өз бетінше баспана ала алуы мүмкін. Сөйтіп, кезекте тұру құқығынан айырылады. Басқа елдімекенге тұрақты тұруға көшіп кететіндер бар. Бұл жағдайда да мемлекеттік тұрғын үй қорындағы үйге мұқтаж бола алмайды. Осы себепті кезектен шығарылатын азаматтар мемлекеттік көмек шынымен мұқтаж адамдарға жетуі керек екенін түсінуі керек.

Бөлісу