Басты Жаңалықтар Елена Рыбакина WTA-дің финалдық турнирінде жеңіске жетті

Елена Рыбакина WTA-дің финалдық турнирінде жеңіске жетті

01.11.2023 22:15

Қазақстан спортшылары жыл соңына қарай сенсация жасап, тарихи жетістіктерге жетіп жатыр. Еліміздің бірінші, әлемнің төртінші ракеткасы Елена Рыбакина тарихта алғаш рет WTA-дің финалдық турнирінде жеңіске жетті. Қазақстандық теннисші екінші айналымда грекиялық Мария Саккариді 2:1 есебімен жеңді. Кездесуде Елена 6 эйс жасап, 9 брэйк-пойнттың төртеуін өз пайдасына жазды. Осы жеңістің арқасында отандасымыз топтан шығу мүмкіндігін сақтап қалды.

Ол бұған дейін әлемдік рейтингте өзінен бір саты тұрған Джессика Пегуладан ойсырай жеңілген еді. АҚШ өкілі әлемнің бірінші ракеткасы Арина Сабаленканы да жеңіп, турнирдің жартылай финалына мерзімінен бұрын шықты. Енді Елена Рыбакина мен Арина Сабаленко соңғы турда Bacalar тобындағы екінші жолдаманы сарапқа салады. Бұл матч 3 қарашаға қараған түні өтеді.

Айта кетейік, Мексикадағы финалдық турнир – маусымдағы әйелдер арасындағы соңғы ірі жарыс. Онда ең үздік сегіз теннисші кортта кездеседі. Жарыстың жүлде қоры – 9 миллион доллар.

Асылбек Данияр

Автор

Асылбек Данияр

Бөлісу