Түркияның алғашқы астронавты ғарышқа ұшты

Осыдан бірнеше сағат бұрын Түркияның бірінші астронавты ғарышқа ұшты. Түрік әуе күштерінің пилоты 44 жастағы Алпер Гезеравжы үш еуропалық әріптесімен бірге АҚШ-тың Флорида штатының Канаверал мүйісіндегі Кеннеди ғарыш оталығынан көкке самғады.

Бұл экипаж Жерден 400 шақырым биіктіктегі Халықаралық ғарыш станциясына сенбі күні таңертең жетуі керек.

Оларды орбиталық бекетке әйгілі миллиардер Илон Масктың «Спэйс Икс» компаниясының «Крью Дрэгон» кемесі жеткізеді.

Бұл экипаж станцияда 14 күн болып, 30 шақты ғылыми тәжірибе өткізуі керек.

Арыстан Рысбек